捷克大換血輸經驗
熱刺孖寶壓陣英幼獅鑊氣
18/11/2008
文： 安高

大換血捷克U21，今晚首度出師作客英格蘭踢熱身賽，新帥杜華利就要面對大量新球員默契同質素不足問題。最慘係英格蘭U21今鋪仲特登搵埋「卡士」十足艾朗連儂同費沙甘保組成Fit爆熱刺進攻組合，捷克仲唔係等做炮灰？安高捧2.35倍「讓球主勝」！（now671台及廣東體育周三凌晨3:45直播）
U21歐洲國家盃外圍賽上個月圓滿結束，英格蘭靠附加賽到出年決賽周入場券，捷克就已經提早畢業。冇份踢決賽周，捷克U21就實行大換血，領隊先由曾經過U17同U19捷克國家隊杜華利接手，球員方面則放棄部分快將超齡球員，當中仲包括埋首席射手尼斯迪，今晚鬥英格蘭大軍入面，杜華利足足搵七個新人，無論質素、經驗同默契都非常輸蝕。


艾朗連儂費沙甘保有料到


另邊廂英格蘭，出線附加賽贏得核突，領隊皮雅斯都知道有必要提升實力，因此原本已經有唔少英超球員在內陣容之中，再搵兩個大國腳曼城後米卡李察士同熱刺快翼艾朗連儂歸隊，雖然最後米卡李察士同新星文切尼都畀卡比路揀中，抽調去大國腳，但一個艾朗連儂壓陣，「小三獅軍團」進攻火力都會大大增強。
事實上，負責為英格蘭U21衝鋒陷陣，就係由曼聯外借熱刺、早排踢聯賽盃對住利物浦都入兩粒前鋒費沙甘保壓陣，呢位前鋒新星同艾朗連儂熱刺已經培養一定默契，再加埋全能中場奧哈拉，要撕破成軍冇耐捷克U21防線，應該冇乜難度！

本贴跟从标题: