多蒙特有把“厄”

德甲球隊卡斯魯厄上季有不俗表現，亦曾被稱為神奇球隊，可惜今季毫無驚喜，上周聯賽輸畀包尾的科特布斯之後，已經跌入降班漩渦之中。當然，目前只係踢咗三分一賽程，仲係言之過早，但仲唔極力搶分的話，咁就後悔都太遲。今晚主場對住多蒙特，要搶分真係唔易，始終本身實力並非太強，相比多蒙特稍為欠缺平均，唯一只能靠主場優勢，仲要踢出加一波，否則仍會處於劣勢。

今季加盟的巴西援將達施華已經算係卡斯魯厄的鎮“隊”之寶，但足球比賽，單天又怎能保至尊，即使加多一個格魯吉亞國腳艾舒維尼，卡斯魯厄就只係咁多料，難怪到目前為止都只係贏過三場波，仲係波琴、比勒費爾德及禾夫斯堡位置較後球隊，今仗對住實力派的多蒙特，如果攞到一分都心滿意足。

多蒙特班波擁有一定實力，陣中的羅拔高華斯、基爾、天加、華迪斯等都係身經百戰兼有級數球員，只不過衰在表現飄忽，時好時壞發揮欠缺平穩，幸好上周大炒法蘭克福四比○，可以為今仗打下一支強心針。

推介：多蒙特 2:1

本贴跟从标题: