足球资料吧-->名家專欄:蘇斯黑柴

蜜蜂兵團追上門
卡爾斯魯厄大難臨頭
21/11/2008
文：蘇斯黑柴

德甲獨腳戲卡爾斯魯厄主場迎戰多蒙特，主隊近期愈踢愈沉，上仗護級大戰不敵榜尾科特布斯大受打擊，今晚遇上回勇多蒙特睇怕好難發圍，多蒙特小讓平半宜捧上盤。（有線足球台61周六凌晨3時30分直播）

卡爾斯魯厄今季實力大幅削弱，已無復上季黑馬本色，至今十三場聯賽輸九場，近七場聯賽更只得一分，尤其上仗敗於降班膽科特布斯腳下，搞到榜尾形勢大亂，自己跌落護級深淵同時，亦連累埋其他護級球隊，事實上佢本身人腳實力已經有限，仲有多名主力球員跌晒Watt，上季表現出色拜仁借將哥列斯，經過長期受傷復出後完全踢唔番水準，上仗直情坐足九十分鐘冷板冇得落場；後防大將法蘭斯因傷缺陣亦係該隊致命傷，今仗繼續搵「鑊王」馬田史杜爾頂檔，防線令人擔心。加上季初表現神勇門將馬古斯米拿近期表現亦大為失色，成隊波都唔在狀態，現階段對邊隊都唔樂觀。

多蒙特信心返晒

「蜜蜂仔」多蒙特係黑柴今季銀行球隊之一，估計佢排名仲有大把上升空間，經過上仗大勝法蘭克福後，球隊信心返晒，今場作客依然可以睇高一線，今仗雖有戴迪同希度華迪斯因傷缺陣，中堅羅拔高華停賽，但上仗傷出隊長基爾趕及傷愈，加上中堅曉姆斯傷愈隨時候命，尚算強陣出擊，不過周六凌晨賽事經常出現唔合理賽果，今仗捧多蒙特不宜大注，留番彈藥周六、日搏殺。
除揀客軍上盤，兩軍後防都唔算穩陣，多蒙特門將維丹費拿近期亦頻頻犯錯，估計卡爾斯魯厄主場出擊踢法唔會太保守，入球大亦可以兼顧一票。