足球资料吧-->名家專欄:關爺心水

杜伊斯堡換帥有得救
21/11/2008
文：關爺

關爺上周勁踩杜伊斯堡，皆因當時球隊炒完練，群龍無首，結果真係輸波收場，不過佢今晚主場出戰ＦＳＶ法蘭克福情況完全唔同，一來對手較弱，二來會方已經聘請新練紐奴亞救亡，呢位五十三歲頭係有名「球隊醫生」，有佢幫手，關爺睇好杜伊斯堡今場可以反彈。
紐奴亞此前曾經執過十一支球隊，包括史浩克04、哈化柏林及漢諾威等德甲球隊，經驗非常豐富，而且佢往往都係臨危受命領軍，對於拯救處於困境球隊的確有一手，亦係杜伊斯堡請佢主因，球隊有一位名帥壓陣，自然有助提升球員信心。

亞琛主Ｗ又叫胡

與此同時，紐奴亞亦身負為球隊瘦身任務，要將目前三十一位球員縮減至二十三名，所以每位球員為保飯碗，未來賽事肯定搏老命。而且包尾ＦＳＶ法蘭克福係今季德乙魚腩球隊，聯賽只係贏得一場咁大把，而且好多時連破蛋也乏力，睇怕今次將會畀杜伊斯堡祭旗。
另一場，亞琛主場對奧斯納貝克，亞琛今季聯賽主場六戰只係輸過一場，其餘全部贏晒，奧斯納貝克作客仲未開齋，冇得同主隊鬥。至於艾倫主場對恩高斯達特，兩隊都係大開大合型球隊，今次對賽捧入球大數。