足球资料吧-->名家專欄:朱楓心水

卡爾斯回勇出齊架生捉蜜蜂
21/11/2008
文：朱楓

今晚德甲獨腳戲卡爾斯魯厄主場對多蒙特，計牌面無疑多蒙特高，之不過「蜜蜂兵團」有五名主力踢完國際賽，今場未必有十足狀態上陣，加上上場聯賽增添希度華迪斯同基爾兩名傷兵，中堅羅拔高華又繼續坐波監，陣容隨時天殘地缺，作客仲要讓波認真唔合理，朱楓建議大家博下盤！（有線61周六凌晨3:30直播）
自從九月尾同十月頭連贏禾夫斯堡同比勒費爾德後，唔經唔覺卡爾斯魯厄聯賽已經七場不勝，係就係曳，但其實近況已經有改善，好似前仗落後利華古遜三球連追三球打成平手，絕對係佢今季代表作，就算上場作客以○比一輸畀榜尾科特布斯，都仲有成六成二時間控球在腳，而且射門高達二十次，比對手足足多出五次，輸波確實有唔抵。況且陣容方面，卡爾斯魯厄目前只有後備門將安加一名傷兵，周中亦只得前鋒約舒亞堅尼地幫澳洲比賽，影響絕對有限，今場基本上可以出齊架生。

多蒙特陣容天殘地缺

雖然多蒙特上輪主場以四比○大勝法蘭克福，不過代價就認真大，前鋒希度華迪斯同中場基爾都先後受創退下火線，今場好大機會連同繼續停賽中堅羅拔高華一齊缺陣，倒戈夏捷拿因傷周中已經退出匈牙利國家隊，今場亦上陣成疑。
除此之外，「蜜蜂兵」前鋒阿歷山大費爾、中場巴拉斯塞高斯基、紐尼沙軒、後魯卡維拿同李榮杓早兩日先幫國家隊比賽，今場未必有十足狀態上陣，隨時令多蒙特實力大打折扣，作客卡爾斯魯厄唔好話和波，隨時輸埋亦唔出奇。