足球资料吧-->赛前分析4

西班牙球壇最早檔
21/11/2008

自從金融海嘯席捲全球後，唔少舖頭都「做唔住」，相繼執笠；打工仔一樣死，各大機構逐間裁員，失業率急升，總之就慘情喇。至於足球圈，都不能幸免囉，歐洲各地球會都爆發經濟危機，其中西班牙球會更危機四伏，話唔定引發一輪破產潮！

負債纍纍西乙高危

波男唔係唯恐天下不亂，但西班牙傳媒最近公布西班牙球會負債數量，的確非常驚人。據悉現時西班牙球會合共負債達三十億歐元（約三百億港元），西班牙足球聯賽副主席泰巴斯更用「極度擔心」形容現時情況，皆因球會負債兼遇上金融海嘯，佢擔心有好多球會頂唔住，最終要破產收場。
危機四伏當然唔係一線球會，而係好似西乙呢類次級球會，好似皇家蘇斯達、切爾達及利雲特，本身已經負債纍纍，經濟衰退之下，今年唔少機構又唔肯贊助球隊，令球會收入大受影響；另外亦缺乏電視廣告收入，加上觀眾又勒住荷包，入場人數大幅削減，令球會難以生存。再者，球員薪酬近年水漲船高，球會經營的確非常吃力。
波男係西班牙波擁躉，特別係皇馬，想當年何等輝煌，施丹、碧咸、費高、朗拿度、魯爾、卡路士組成「銀河艦隊」，每個月出糧都唔知要幾多「茄殊」至埋到單，但波又真係好好睇。點知依家就折墮咯，「雲佬」長抖，只係搵個就雪僵基斯普頂替，真係今非昔比。
如果西班牙球會唔掂話，歐洲四大聯賽就只係剩番英格蘭頂住，但海嘯唔知幾時至退，散埋都唔出奇！